CDC பற்றுச்சீட்டுகள் திட்டத்தில் பங்கெடுப்பதற்கான விதிமுறைகளும் நிபந்தனைகளும்

As of March 2025

சமூக மேம்பாட்டு மன்றப் பற்றுச்சீட்டுகள் திட்டத்தில் பங்கெடுப்பதற்கான விதிமுறைகளும் நிபந்தனைகளும்

(“திட்டம்”)

 திட்டத்தில் பங்கேற்பதன் மூலம் (அரசாங்கத்தால் அவ்வப்போது அறிவிக்கப்படும் இத்திட்டத்தின் கூடுதல் தவணைகள் உட்பட) கீழே குறிப்பிடப்பட்டுள்ள விதிமுறைகளுக்கும் நிபந்தனைகளுக்கும், மற்றும் அவற்றுக்கு அவ்வப்போது செய்யப்படக்கூடும் ஏதேனும் மாற்றங்களுக்கும், சட்டப்பூர்வமாகக் கட்டுப்படுவதை ஒப்புக்கொள்கிறீர்கள்.   

இந்தத் திட்டத்தில் அரசாங்கம் அல்லது பிற அரசாங்க நிறுவனங்களால் நடத்தப்படும் நாடு தழுவிய பிற பற்றுச்சீட்டுத் திட்டங்களும் அடங்கும். கீழே கொடுக்கப்பட்டுள்ள விதிமுறைகள் மற்றும் நிபந்தனைகள் குறிப்பிட்ட காலத்திற்கு அந்தத் திட்டங்களுக்கும் பொருந்தும், பின்வருமாறு:

a. பிரிவு 2 முதல் 7 வரை, "CDC பற்றுச்சீட்டுகள்" அல்லது "பற்றுச்சீட்டுகள்" பற்றிய குறிப்புகள் நாடு தழுவிய பற்றுச்சீட்டு திட்டத்தின் கீழ் வழங்கப்பட்ட பற்றுச்சீட்டுகளை உள்ளடக்கும்; மற்றும்

b. பிரிவுகள் 6, 7 மற்றும் 11 இல், "மக்கள் கழகம்", "PA" அல்லது "PA (CDC கள் மூலம்)" பற்றிய குறிப்புகள் நாடு தழுவிய பற்றுச்சீட்டுத் திட்டத்தை நிர்வகிக்கும் அரசாங்கம் அல்லது அரசு நிறுவனத்தை உள்ளடக்கும்.

இந்த விதிமுறைகள் மற்றும் நிபந்தனைகளில் ஏதேனும் மாற்றங்கள் இருந்தால், அதற்கேற்ப உங்களுக்கு அறிவிக்கப்படும்.

1          CDC பற்றுச்சீட்டுகள் சின்னம் (வரவேற்பு தொகுப்பில் சேர்க்கப்பட்டுள்ளது) திட்டத்தில் நீங்கள் பங்குபெறும் காலம் முழுவதும் வரவேற்பு தொகுப்பு கிடைத்தவுடன் உடனடியாக உங்கள் கடையின் முன்புறத்தில் தெளிவாகக் காட்டப்பட வேண்டும். CDC பற்றுச்சீட்டுகள் சின்னத்தைக் காண்பிக்கும் உங்கள் கடை இந்த விதிமுறைகள் மற்றும் நிபந்தனைகளில் "வளாகம்" என்று குறிப்பிடப்படும்.

2          CDC பற்றுச்சீட்டுகள் சின்னம் காட்சிப்படுத்தப்பட்டவுடன், பற்றுச்சீட்டு வைத்திருப்பவர்கள் (அதாவது குடியிருப்பாளர்கள்) வழங்கும் அனைத்து பற்றுச்சீட்டுகளையும் ஏற்க ஒப்புக்கொள்கிறீர்கள், மேலும் உங்கள் வளாகத்தில் CDC பற்றுச்சீட்டுகள் ஏற்றுக்கொள்ளப்படும் நாள்கள் அல்லது மணிநேரங்களைக் கட்டுப்படுத்தவோ அல்லது வரம்பிடவோ கூடாது.

3          இத்திட்டம் மின்னிலக்க வடிவிலானது. பற்றுச்சீட்டுகள் QR குறியீடுகளின் வடிவில் இருக்கும். பற்றுச்சீட்டுகளை வைத்திருப்போர் (அதாவது, குடியிருப்பாளர்கள்) குறியீடுகளைக் காட்டி மதிப்பை மீட்டுக்கொள்வார்கள்.  மின்னிலக்கப் பற்றுச்சீட்டை மீட்புக்கு ஏற்பதற்குமுன், எல்லா பற்றுச்சீட்டு மீட்புகளும் பின்வரும் விதிமுறைகளுக்கும் நிபந்தனைகளுக்கும் உட்படுவதை உறுதிசெய்ய உங்களால் முடிந்த அனைத்து முயற்சிகளையும் நீங்கள் மேற்கொள்ளவேண்டும்:

 (அ) லாட்டரி, பெட்ரோல், டீசல், மதுபானம் அல்லது சிகரெட் வாங்குவதற்குப் பற்றுச்சீட்டுகளைப் பயன்படுத்த முடியாது;

 (ஆ) பற்றுச்சீட்டுகளை ரொக்கப் பணத்திற்கு அல்லது அன்பளிப்புப் பற்றுச்சீட்டுகளுக்குப் பரிமாற்றம் செய்ய முடியாது. அவற்றை மறுவிற்பனையும் செய்யக்கூடாது;

 (இ) ஒரே பரிவர்த்தனையில் ஒன்றுக்கு மேலான பற்றுச்சீட்டுகளைப் பயன்படுத்தலாம்;

(ஈ) பற்றுச்சீட்டின் பயன்படுத்தப்படாத தொகை/மதிப்பு திருப்பித் தரப்படாது; அதோடு

(உ) பற்றுச்சீட்டு காலாவதியான பிறகு அதனைப் புதுப்பிக்க முடியாது.  காலாவதி தேதியே இறுதியானது.

4          பற்றுச்சீட்டுகளை வைத்திருப்போரில் (அதாவது, குடியிருப்பாளர்கள்) சிலர், மின்னிலக்கப் பற்றுச்சீட்டுகளின் அச்சீடுகளை மீட்புக்குப் பயன்படுத்தக்கூடும்.   அதுபோன்ற சூழ்நிலைகளில், காலாவதியான, சிதைந்த, சேதமடைந்த, திருடப்பட்ட, நகலெடுக்கப்பட்ட அல்லது போலி பற்றுச்சீட்டு அச்சீடுகள் எதுவும் மீட்புக்கு ஏற்கப்படாதிருப்பதை உறுதிசெய்ய உங்களால் முடிந்த அனைத்து முயற்சிகளையும் நீங்கள் மேற்கொள்ளவேண்டும்.

5          பற்றுச்சீட்டுகள் RedeemSG Merchant செயலி வழியாக மீட்கப்படவேண்டும்.  உங்களது RedeemSG Merchant செயலியின் பயன்பாட்டுக்கென தனி விதிமுறைகளும் நிபந்தனைகளும் உள்ளன. அவற்றை RedeemSG Merchant செயலியிலும் https://redeem.gov.sg இணையப்பக்கத்திலும் காணலாம்.   பற்றுச்சீட்டின் மீட்பு RedeemSG Merchant செயலியில் பதிவு செய்யப்பட்டு 1 நாளுக்குப் பிறகு, மீட்கப்பட்ட பற்றுச்சீட்டுகளின் மதிப்பு உங்களுக்கு PayNow மூலம் (அல்லது அதுபோன்ற வேறு இணைய வங்கிச்சேவை மூலம்) கிடைக்கும்.

6          மீட்கப்படும் பற்றுச்சீட்டு ஏதேனும் தவறாகப் பயன்படுத்தப்பட்டதாக, திருடப்பட்டதாக, போலியாக்கப்பட்டதாக, சேதப்படுத்தப்பட்டதாக, சிதைக்கப்பட்டதாக அல்லது வேறுவிதத்தில் மோசடி செய்யப்பட்டதாகக் கண்டறியப்பட்டால், அதன் மதிப்பைக் கொடுக்காதிருக்கும் உரிமை அல்லது ஐயத்திற்குரிய பற்றுச்சீட்டுக்காக உங்களிடமிருந்து (கொடுக்கப்பட்டிருந்தால்) மதிப்பை மீட்கும் உரிமை மக்கள் கழகத்திற்கு ("PA") உண்டு.

7         பங்கேற்கும் வணிகர்/உணவங்காடிக் கடைக்காரர் எவரேனும் பற்றுச்சீட்டை அல்லது பற்றுச்சீட்டின் அச்சீட்டைத் தவறாகப் பயன்படுத்தியதாக, போலியாக்கியதாக, சேதப்படுத்தியதாக, சிதைத்ததாக, அல்லது வேறுவிதத்தில் மோசடி செய்ததாகக் கண்டறியப்பட்டால், பங்கேற்கும் வணிகர்/உணவங்காடிக் கடைக்காரர் அந்தப் பற்றுச்சீட்டுகளின் மதிப்பையும், அவர் செய்த செயலின் விளைவாக மக்கள் கழகத்திற்கு நேர்ந்த மற்ற இழப்புகளையும் மக்கள் கழகத்திடம் செலுத்துவதற்குப் பொறுப்பாவார்.

8          பற்றுச்சீட்டுகளைத் தவறாகப் பயன்படுத்துவது/ மோசடி செய்வது / போலியாக்கம் செய்வது சட்டப்படி குற்றமாகும், இக்குற்றத்தைப் புரிபவர்மீது சட்டப்படி நடவடிக்கை எடுக்கப்படும்.

9          சேகரிக்கப்படும் தொழில்நிறுவனத் தொடர்புத் தகவல் (தனிநபர் தகவல் பாதுகாப்புச் சட்டம் 2012-ல் உள்ளபடி), தனிநபர் தகவல் (இருந்தால்) உள்ளிட்ட அனைத்து தகவல்களும், திட்டத்தை நிர்வகிக்கும் நோக்கங்களுக்காகப் பயன்படுத்தப்படும், பிற அரசாங்க அமைப்புகளிடம் (அரசாங்கத் தொழில்நுட்ப அமைப்பு போன்றவை) வெளியிடப்படும்.  எங்களுக்கு உங்களது தொழில்நிறுவனத் தொடர்புத் தகவல் (வங்கிக் கணக்கு விவரங்கள், தொடர்பு விவரம், உங்கள் தொழிலுக்குப் பயன்படுத்தும் நிறுவனப் பதிவு எண் போன்றவை) மட்டுமே தேவை என்றாலும், தொழில்நிறுவனத் தொடர்புத் தகவலுக்குப் பதிலாகத் தனிநபர் தகவலை நீங்கள் வழங்க  விரும்பினால், உங்களது தனிநபர் தகவலையும் (அடையாள அட்டை எண் போன்றவை) நாங்கள் ஏற்றுக்கொள்வோம்.

10        திட்டத்தில் பங்குபெறும் ஒரு வணிகர்/கடை வியாபாரி என்ற முறையில், உங்கள் ஊழியர்கள் உங்கள் வளாகத்தில் சட்டவிரோதமான, ஒழுக்கக்கேடான, பாரபட்சமான, தாக்குதல் அல்லது திட்டத்தையும் / அதனுடன் தொடர்புடைய PA ஐ அவமானப்படுத்தக்கூடிய எந்தவொரு செயலையும் மேற்கொள்ளமாட்டீர்கள் என்பதை நீங்கள் ஒப்புக்கொள்கிறீர்கள் மற்றும் உறுதி செய்வீர்கள்.  நிகழ்வில் அது பொருத்தமானது என்று கருதும் உடனடி நடவடிக்கையை எடுக்க மக்கள் கழகத்திற்கு உரிமை உள்ளது.

11        பங்கேற்கும் வணிகர்கள்/உணவங்காடிக் கடைக்காரர்கள் தங்களுக்கும் பற்றுச்சீட்டு வைத்திருப்பவருக்கும் (அதாவது, குடியிருப்பாளர்) இடையில் எழக்கூடிய ஏதேனும் பிரச்சனைகளுக்கு அல்லது சர்ச்சைகளுக்குத் தீர்வு காண்பதற்குப் பொறுப்பாவார்கள்.  மக்கள் கழகம் (பற்றுச்சீட்டு வழங்குபவர் என்ற முறையில்) இத்தகைய பிரச்சனைகளுக்கு அல்லது சர்ச்சைகளுக்குத் தீர்வு காண்பதற்கு, அல்லது பங்கேற்கும் வணிகர்கள்/உணவங்காடிக் கடைக்காரர்கள் ஆகியோருக்கும் பற்றுச்சீட்டு வைத்திருப்பவருக்கும் இடையிலான பரிவர்த்தனை அல்லது கொடுக்கல்வாங்கலால் அல்லது அவற்றின் தொடர்பில் எழக்கூடிய எந்த வகையான வேண்டுகோள்கள், கோரிக்கைகள், இழப்புகள், கட்டணங்கள், செலவுகள் மற்றும்/அல்லது பொறுப்புகள் எதற்கும் பொறுப்பாகாது.

12        முன் எழுத்துப்பூர்வ அறிவிப்பு இல்லாமல் எந்த நேரத்திலும் திட்டத்தில் உங்கள் பங்கேற்பை நிறுத்துவதற்கான உரிமையை மக்கள் கழகம் கொண்டுள்ளது.  அத்தகைய முடிவின் விளைவாக ஏதேனும் சேதங்கள் அல்லது இழப்பீடுகளுக்கு மக்கள் கழகம் உங்களுக்குப் பொறுப்பேற்காது.  அத்தகைய முடிவுக்கான காரணத்தை மக்கள் கழகம் முன்னணியும் தெரிவிக்க வேண்டியதில்லை.  எழுத்துப்பூர்வ அறிவிப்பில் குறிப்பிடப்பட்டுள்ள தேதியில் திட்டத்தில் உங்கள் பங்கேற்பு நிறுத்தப்படும் மற்றும் அதே தேதியில் உங்கள் வளாகத்தில் இருந்து CDC பற்றுச்சீட்டுகள் சின்னங்களை அகற்ற வேண்டும்.

13        இந்த விதிமுறைகளும் நிபந்தனைகளும் சிங்கப்பூரின் சட்டங்களுக்கு ஏற்ப நிலைநாட்டப்படும்.